Shkolla tregtare e Vlorës, një prej institucioneve arsimore profesionale më të preferuara nga të rinjtë e Vlorës dhe në përgjithësi të zonës së jugut, do të mbyllet së shpejti. Qeveria shqiptare pritet të firmosë vendimin për mbylljen e saj dhe bashkimin me Shkollën Profesionale “Pavarësia”.
E themeluar rreth 100 vite më parë, në Nëntor 1924, godina ku mësojnë qindra nxënës për degët Hoteleri Turizëm dhe Ekonomi do të mbyllet.
Mësohet se në zonën e mrekullueshme ku ajo ndodhet, në Ujin e Ftohtë, do të ndërtohet një hotel. Ndërkohë, zyrtarisht pretendohet se Shkolla Tregtare do të zhvendoset në qendër të qytetit, sepse do të krijohet një kampus i përbashkët me Shkollën Profesionale “Pavarësia”.
Ky kampus, ka gjasat të ndërtohet në qendër të qytetit, në vendin ku ndodhet sot Shkolla Profesionale “Pavarësia”. Krijimi i kampusit të përbashkët për dy shkollat profesionale të Vlorës parashikon dhe integrimin e restaurimin e konvikteve.
I pranishëm sot në qytetin bregdetar ka qenë dhe ministri i Pushtetit Vendor, Arbi Mazniku i cili është takuar me drejtuesit e Bashkisë së Vlorës dhe të shkollave.
Pritet që shpejt atje të nisë puna për ndërtimin e këtij kampusi, pasi përfaqësuesi i qeverisë ka kërkuar nga drejtuesit e dy shkollave profesionale që të bëjnë vlerësimet përkatëse për sallat, laboratorët dhe të gjitha hapësirat e nevojshme.
Mazniku ka kërkuar që sapo këto të jenë gati, të hartohet masterplani dhe qeveria e bashkia të nisin punën për krijimin e kampusit që do të integrojë Shkollën Tregtare të Vlorës dhe Shkollën Profesionale “Pavarësia”.
Shkolla e ideuar nga rilindasi Sami Frashëri është mbyllur vetë një herë gjatë gjithë veprimtarisë së saj 100 vjeçare, nga diktatori italian Benito Musolini (Duçja), i cili e ktheu shkollën në kazermë ushtarake në Maj të vitit 1943. Tashmë, kodrës së bukur ku ndodhet shkolla ia kanë vënë syrin ndërtuesit.
Shto koment