U shmang tragjedia, flet turisti italian në Zvërnec: Kishim një fëmijë në jahtin që u mbyt, për fat të mirë nuk vdiqëm

Një jaht është përmbytur në bregdetin e Zvërnecit në Vlorë gjatë orëve të para të mëngjesit të sotëm.

Jahti me katër turistë, përfshirë një fëmijë është përplasur me disa shkëmbinj nënujorë në afërsi të Zvërnecit.

Në vendin e ngjarjes ka mbërritur policia dhe roja bregdetare. Një nga turistët ka treguar se ishin nisur nga Sllovenia dhe gjithçka ka ndodhur në orët e para të mëngjesit.

“Skafi nuk kishte asgjë. U nisëm nga Sllovenia. Udhëtuam në gjithë Kroacinë, Malin e Zi, Bosnje-Hercegovinë dhe nuk patëm asnjë problem.

Pastaj në orën 04:30 të mëngjesit ndodhi incidenti në brigjet e Shqipërisë. Shkëmbinjtë duhen sinjalizuar, për fat të keq nuk ishin sinjalizuar dhe u goditëm. Por për fat të mirë nuk vdiqëm, vdiq varka. Ishim katër persona, përfshirë një fëmijë”, tha turisti italian.

Policia vijon hetimet për të zbuluar shkaqet e aksidentit.